4 მთავარი პროპაგანდისტული მეთოდი

ეს მეთოდი მთავარი ამბიდან ყურადღების სხვა არააქტუალურ ამბავზე გადატანას გულისხმობს. ,,კომუნისტი“ ამ წლების სტატიებში 1924 წლის აჯანყების მონაწილეებს ბრალად სდებდა როგორც საბჭოთა ხელისუფლების წინააღმდეგ ბრძოლას, ასევე საზოგადოების მიმართ განხორციელებულ რეპრესიებსა და ძალადობას. ასევე სტატიაში ყურადღება გამახვილებული იყო იმაზე, რომ აჯანყებულები ცდილობდნენ „დასავლური იმპერიალისტური ძალების“ მხარდაჭერის მოპოვებას, რაც მათი მოქმედებების უკან უცხოეთის გავლენაზე მიუთითებდა. ,,იმედის“ მიერ გავრცელებულ ნიუს-ქარდებში პირდაპირი გზით არის გამოყენებული ეს მეთოდი. კონკრეტულად, აღნიშნულია ქმედება ან განცხადება, რაც სახელისუფლებო ნარატივს ეწინაამდეგება და შემდეგ მიბმულია ის ინფორმაცია, რომელიც ამ ინფორმაციის დისკრედიტაციას ეწევა და მკითხველისთვის სურს არა რეალურად აქტუალური თემის, არამედ სხვა თემის ფოკუსში მოქცევა. მაგალითად, ,,იმედის“ ერთ-ერთ ქარდზე ვკითხულობთ, რომ გერმანიის ბუნდესტაგი საქართველოს არჩევნებზე იმსჯელებს. მის შემდეგ ვკითხულობთ, რომ გერმანიის მმართველი კოალიცია დაიშალა. ამით მკითხველს ყურადღება გადააქვს ბოლოს მოყვანილ ინფორმაციაზე, რადგან სიტყვები ,,კოალიცია დაიშალა“ და ,,რიგგარეშე არჩევნები“ მისთვის უფრო აქტუალური და ნაცნობია, შედეგად რიგითი მკითხველისთვის მნიშვნელობას აღარ წარმოადგენს ის ფაქტი, რომ გერმანიის ბუნდესტაგი საქართველოს არჩევნებზე იმსჯელებს. აღსანიშნავია, რომ აქცენტი დასმულია თარიღებზეც, რისი მიზანიც ბუნდესტაგში დაგეგმილი მსჯელობისთვის აბსურდულობის შეძენაა. აღსანიშანვია, რომ ეს ქარდი, მხოლოდ მას შემდეგ დაიდო იმედის ფეისბუქ გვერდზე, რაც ხელახალი არჩევნების ჩატარების ამბავი გახდა ცნობილი. იმავე მიდგომა ვრცელდება სხვა მსგავსს ქარდებზეც.